საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტროს ინიციატივით ამოქმედდა ექთნებისა და მეან-ექთნების ელექტრონული რეესტრი, რაც წარმოადგენს მნიშვნელოვან ნაბიჯს ჯანდაცვის სისტემის ინსტიტუციური გაძლიერებისა და პროფესიული სტანდარტების განვითარებისთვის.

რეესტრი არის ერთიანი ელექტრონული პლატფორმა, სადაც თავმოყრილია მონაცემები ექთნებისა და მეან-ექთნების ავტორიზაციის, სახელმწიფო სერტიფიკატის ან რეგისტრაციის მოწმობის გაცემის, განახლების, შეჩერებისა და გაუქმების შესახებ. სისტემის მიზანია პროფესიული საქმიანობის გამჭვირვალობის უზრუნველყოფა, ხარისხის კონტროლის გაძლიერება და სანდო მონაცემთა ბაზის ფორმირება.

ავტორიზაციის პროცესი ხორციელდება ელექტრონულად, რაც მნიშვნელოვნად ამარტივებს განაცხადის შეტანის პროცედურას და ამცირებს ადმინისტრაციულ ბარიერებს. რეესტრის წარმოებასა და მართვას უზრუნველყოფს სამედიცინო და ფარმაცევტული საქმიანობის რეგულირების სააგენტო.

აღნიშნული ინიციატივა განსაკუთრებულ მნიშვნელობას იძენს თავად ექთნებისა და მეან-ექთნებისთვის. ეს პროფესია წარმოადგენს არა მხოლოდ სამუშაოს, არამედ მაღალ პასუხისმგებლობას ადამიანის სიცოცხლესა და ჯანმრთელობაზე. რეესტრში რეგისტრაცია ნიშნავს პროფესიული სტატუსის ოფიციალურ აღიარებას, ნდობის ზრდას პაციენტებისა და დამსაქმებლების მხრიდან და პროფესიული განვითარების ახალი შესაძლებლობების ხელმისაწვდომობას.

ელექტრონული რეესტრი თითოეულ ექთანსა და მეან-ექთანს აძლევს შესაძლებლობას, საკუთარი პროფესიული საქმიანობა განახორციელოს დაცულ, გამჭვირვალე და თანამედროვე სისტემაში, რაც კიდევ ერთხელ ადასტურებს, რომ მათი შრომა დაფასებულია და მხარდაჭერილია სახელმწიფოს მიერ.

რეგისტრაცია ხელმისაწვდომია შემდეგ ბმულზე

ასევე ხელმისაწვდომია რეგისტრაციის ინსტრუქცია PDF ფორმატში, რომელიც დეტალურად აღწერს განაცხადის შევსების ეტაპებსა და საჭირო დოკუმენტაციის წარდგენის წესს. ძლიერი ჯანდაცვის სისტემა იწყება კვალიფიციური, პასუხისმგებელი და აღიარებული პროფესიონალებით.