ეროვნულიშემაჯამებელიკონფერენცია – „პოლიტიკა, ლიდერობადასისტემურიგანვითარება“

2026 წლის 5 ივნისს, თბილისის სახელმწიფო სამედიცინო უნივერსიტეტში გაიმართა „ექთნებისა და მეანი ექთნების საერთაშორისო კვირეული 2026“-ის ეროვნული შემაჯამებელი კონფერენცია – „პოლიტიკა, ლიდერობა და სისტემური განვითარება“.

კონფერენცია ორგანიზებული იყო ა(ა)იპ „ექთანთა გაერთიანებისა“ (N(N)LE Union of Nurses – Georgia) და თბილისის სახელმწიფო სამედიცინო უნივერსიტეტის (TSMU) მიერ. ღონისძიებამ გააერთიანა სახელმწიფო უწყებების, აკადემიური სექტორის, საერთაშორისო ორგანიზაციების, პროფესიული ასოციაციების, კლინიკური დაწესებულებების, ლიდერი ექთნების, მეანი ექთნებისა და სტუდენტების წარმომადგენლები.

ღონისძიება გახსნეს ა(ა)იპ „ექთანთა გაერთიანების“ დამფუძნებელმა და აღმასრულებელმა დირექტორმა ია გელენიძემ და თბილისის სახელმწიფო სამედიცინო უნივერსიტეტის რექტორმა, პროფესორმა ირაკლი ნატროშვილმა, რომლებმაც ხაზი გაუსვეს საექთნო და სამეანო პროფესიების სტრატეგიულ მნიშვნელობას ქვეყნის ჯანდაცვის სისტემის განვითარების პროცესში.

საერთაშორისოდაეროვნულისპიკერები

კონფერენციის ფარგლებში მონაწილეებს მიმართეს მაღალი დონის საერთაშორისო და ეროვნული ექსპერტებმა, რომლებმაც განიხილეს ჯანდაცვის სისტემის განვითარების, პროფესიული განათლებისა და ლიდერობის მნიშვნელოვანი საკითხები.

ტასმანიის უნივერსიტეტის ასოცირებულმა პროფესორმა Catherine Schofield ისაუბრა საექთნო ლიდერობის, ფსიქიკური ჯანმრთელობის სერვისებისა და სამუშაო ძალის განვითარების მნიშვნელობაზე. მან აღნიშნა, რომ ძლიერი ლიდერობა და ორგანიზაციული მხარდაჭერა წარმოადგენს ჯანდაცვის სისტემების მდგრადობის ერთ-ერთ მთავარ საფუძველს.

ჯანდაცვის მსოფლიო ორგანიზაციის (WHO) ჯანდაცვის პოლიტიკის მრჩეველმა Thomas Roubal ყურადღება გაამახვილა საექთნო და მეანი ექთნების როლზე მდგრადი ჯანდაცვის სისტემების შექმნაში და აღნიშნა, რომ ადამიანური რესურსების განვითარება არის სისტემური რეფორმების ცენტრალური კომპონენტი.

საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტროს ჯანდაცვის პოლიტიკის დეპარტამენტის მთავარმა სპეციალისტმა თეა ბაქრაძემ ისაუბრა საექთნო და სამეანო პროფესიის განვითარების სახელმწიფო პრიორიტეტებზე. მან ხაზი გაუსვა პროფესიული განათლების, უწყვეტი განვითარების, ლიდერობისა და სახელმწიფოსა და პროფესიული საზოგადოების თანამშრომლობის მნიშვნელობას ჯანდაცვის სისტემის გაძლიერების პროცესში.

ამავე სამინისტროს წარმომადგენელმა ვერიკო ბაზიარმა წარმოადგინა დედათა და ბავშვთა ჯანმრთელობის სახელმწიფო პროგრამები და განმარტა მეანი ექთნების გადამწყვეტი როლი ხარისხიანი და უსაფრთხო სერვისების მიწოდებაში.

განათლების ხარისხის განვითარების ეროვნული ცენტრის კვალიფიკაციების განვითარების სამსახურის მთავარმა სპეციალისტმა ლონდა მინდიაშვილმა ისაუბრა პროფესიული განათლების სისტემაზე და აღნიშნა, რომ კვალიფიკაციების განვითარება წარმოადგენს ჯანდაცვის ადამიანური რესურსების მდგრადი განვითარების საფუძველს.

საქართველოს ტურიზმის ასოციაციის თავმჯდომარემ ნატალია კვაჭანტირაძემ განიხილა სამედიცინო ტურიზმის განვითარების პერსპექტივები და საექთნო პროფესიის მნიშვნელობა ხარისხიანი მომსახურების უზრუნველყოფაში.

თბილისის სახელმწიფო სამედიცინო უნივერსიტეტის წარმომადგენელმა მედეა ჯღარკავამ წარმოადგინა საექთნო და სამეანო კომპეტენციების განვითარების მიღწევები და არსებული გამოწვევები საქართველოში.

საქართველოს ბებიაქალთა ასოციაციის პრეზიდენტმა ნატალია ხაჩიძემ ისაუბრა მეანი ექთნების პროფესიის განვითარების საჭიროებაზე და აღნიშნა მათი როლი დედათა და ახალშობილთა ჯანმრთელობის გაუმჯობესებაში.

საერთაშორისოგზავნილები

საერთაშორისო საექთნო საბჭოს (ICN) აღმასრულებელმა დირექტორმა Howard Catton ვიდეომიმართვისას საქართველოს ექთნებსა და მეან ექთნებს მიულოცა საერთაშორისო კვირეულის ფარგლებში უწყვეტი პროფესიული განვითარების წარმატებული ეროვნული პლატფორმის ჩამოყალიბება. მან კონფერენციას წარმატება უსურვა და აღნიშნა, რომ მსგავსი ინიციატივები აძლიერებს პროფესიულ ლიდერობას, განათლებას და ჯანდაცვის სისტემის მდგრადობას. მან ასევე გამოთქვა იმედი, რომ მომავალში შესაძლებლობა ექნება პირადად მიულოცოს საქართველოს ექთნებსა და მეან ექთნებს საერთაშორისო საექთნო საბჭოს (ICN) სრულუფლებიანი წევრობა.

საერთაშორისო ექსპერტმა საექთნო რეგულირებისა და პროფესიული მმართველობის მიმართულებით Douglas Long ვიდეომიმართვაში ისაუბრა პროფესიული რეგულირების, მმართველობისა და საექთნო ლიდერობის განვითარების გლობალურ ტენდენციებზე.

პროფესიულიგანვითარებადაშეჯამება

კონფერენციის მეორე ნაწილი გახსნა თეა ბაქრაძემ, რომელმაც კიდევ ერთხელ გაუსვა ხაზი პროფესიული განვითარების, ლიდერობისა და სახელმწიფოსა და პროფესიულ სექტორს შორის თანამშრომლობის მნიშვნელობას.

ღონისძიების ფარგლებში ასევე განხილულ იქნა ჯანდაცვის სისტემის მმართველობისა და რეგულირების საკითხები, პროფესიული განათლებისა და კვალიფიკაციების განვითარების მიმართულებები, დედათა და ბავშვთა ჯანმრთელობის პროგრამები, სამედიცინო ტურიზმის განვითარება და საექთნო და სამეანო კომპეტენციების გაძლიერება.

კონფერენციის მნიშვნელოვანი ნაწილი იყო პროფესიული აღიარების ცერემონია, რომლის ფარგლებშიც დაჯილდოვდნენ ლიდერი ექთნები, ახალგაზრდა პროფესიონალები, სტუდენტები და ღვაწლმოსილი ექთნები. მონაწილეებს გადაეცათ მადლობის სიგელები და პროფესიული აღიარების ნიშნები.

კონფერენციის დასასრულს ია გელენიძემ შეაჯამა ეროვნული მიღწევები, არსებული გამოწვევები და სამომავლო სტრატეგიული მიმართულებები, განსაკუთრებული აქცენტით პროფესიული განათლების გაძლიერებაზე, ლიდერობის განვითარებაზე და საერთაშორისო თანამშრომლობის გაფართოებაზე.

დასკვნა

„ექთნებისა და მეანი ექთნების საერთაშორისო კვირეული 2026“-ის ეროვნული შემაჯამებელი კონფერენცია კიდევ ერთხელ იქცა მნიშვნელოვან პროფესიულ პლატფორმად, რომელმაც გააერთიანა სახელმწიფო უწყებები, აკადემიური სექტორი, საერთაშორისო პარტნიორები და პროფესიული საზოგადოება საერთო მიზნის გარშემო — საქართველოში საექთნო და სამეანო პროფესიის გაძლიერებისა და მდგრადი განვითარებისათვის.

კონფერენციამ ნათლად წარმოაჩინა, რომ პროფესიული ლიდერობა, განათლება, საერთაშორისო თანამშრომლობა და მტკიცებულებებზე დაფუძნებული პოლიტიკა წარმოადგენს თანამედროვე ჯანდაცვის სისტემის განვითარების საფუძველს.